Færsluflokkur: Stjórnmál og samfélag

Hvers vegna kostar íþróttaiðkun barna svona mikið?

Ég bý svo vel að eiga fjögur yndisleg börn. Fjögur börn þar sem það elsta er einungis 8 ára. Þetta þýðir að komnar eru í spilið tómstundir og áhugamál, sem er nú barasta ekkert annað en heilbrigt og gott þar sem um er að ræða í flestum tilfellum eitthvað sem felur í sér hreyfingu.

Nema hvað að í miðjum skutlunum og æfingunum eru sendir gíróseðlar fyrir æfingagjöldum barnanna sem maður borgar svo bölvandi í hljóði. Nú og hvers vegna skyldi það vera? Ekki er það vegna þess að ég tími ekki að borga tómstundir undir börnin, mér bara blöskrar hvað ég er að borga mikið og fæ í rauninni lítið í staðinn. Hvað meina ég? Ég skal útlista þetta og vonandi sér einhver forsvarsmaður íþróttafélaga þetta og getur sagt mér hvað ég er í rauninni að borga fyrir.

Elsti strákurinn, 8 ára, æfir fótbolta með 6. flokki HK. Þetta eru 8-10 ára strákar og er u.þ.b. 40 stráka hópur að æfa að staðaldri. Ég er að borga 23000 krónur á ári í æfingagjöld og leggur Kópavogsbær 11000 krónur til félagsins á móti. Þetta gerir um 1,4 milljónir á ári fyrir félagið í beinar tekjur. Gjöldin felast væntanlega í þjálfaralaunum og einhverjum aðstöðukostnaði þó að ég viti ekki hver hann er, æft er eingöngu úti á sumrin, eðlilega, en núna fyrir áramót var ein æfing í viku úti og 2 inni í knattspyrnuhúsinu Fífunni. Núna eftir áramót eru 3 inniæfingar á viku, 2 í Fífunni og ein í nýja knattspyrnuhúsinu Kórnum. Alveg ásættanlegt fyrir þennan pening. Það er bara einn hængur á: Æfingarnar eru ýmist kl. 15 eða kl. 16 og ekki eru æfingarnar haldnar í hverfinu. Nei foreldrar þurfa að gjöra svo vel og taka sér frí úr vinnu til að keyra börnunum til æfinga, það eru einungis 15 kílómetrar í Kórinn, þetta er svipað og KR færi að æfa í Breiðholtinu. En æfingagjöldin í fótboltanum eru þolanleg fyrir 3 æfingar á viku allt árið.

Þá komum við að næsta barni hjá mér sem er 4. ára stúlka. Eins og stelpna er von og vísa þá vill hún vera hoppandi og skoppandi, farandi í handahlaup, splitt og spígat í tíma og ótíma þannig að mér verður illt af því að horfa á. Það lá því beinast við að keyra sem leið liggur upp í Versali á fimleikaæfingar hjá Gerplu. Þar er boðið upp á skemmtilegar æfingar fyrir krakkana einu sinni í viku, 50 mínútur í senn. Það sem stingur mann samt svolítið er að þau sem sjá um þjálfun barnanna er einn þjálfari sem mætir stundum (eftir áramót hefur hann mætt í annaðhvert skipti), með honum eru stúlkur sem hafa æft hjá félaginu í einhver ár og eru líklega að borga eitthvað af félagsgjöldunum sínum með því að vera þarna. Svo að lokum eru þarna nokkrir foreldrar sem hjálpa til af bestu getu. Ég hef það fyrir víst að einn pabbinn hafi náð að skrá dóttur sína gegn því að hann myndi verða hluti af þjálfarateyminu. En horfum aðeins framhjá þessu því ég ætlaði að tuða yfir hvað ég þarf að borga mikið fyrir þetta. Þar sem dóttir mín er ekki komin á grunnskólaaldur þá borgar bærinn ekki niður fyrir hana. Ég fékk því reikning fyrir áramót upp á 16400 krónur og annan núna í janúar upp á 21500 krónur, samtals eru þetta æfingagjöld upp á 37900 fyrir veturinn. Yfir veturinn eru u.þ.b. 30 æfingar. Ég er því að borga um 1300 krónur fyrir hverjar 50 mínútur. Það eru um 50 stelpur, 4-5 ára í þessum hóp sem þýðir að Gerpla tekur um 65000 krónur inn í tekjur fyrir hvert skipti og um 1,9 milljónir fyrir veturinn. Hvað á þetta eiginlega að þýða og í hvað fara þessir peningar eiginlega????

Forsvarsmenn í samfélaginu tala alltaf fyrir forvarnargildi íþróttastarfs og ætla ég alls ekki að þræta um það. Hitt er annað mál að hvernig stendur á þessu verði og afhverju koma yfirvöld þá ekki betur að þessu og hvers vegna er ekki greidd niður æfingagjöld fyrir börn á forskólaaldri? Ég sé fram á það eftir um 4-5 ár að vera með 4 börn í einhverskonar íþróttum eða tómstundum og mun þá greiða hátt í ein mánaðarlaun í æfingagjöld fyrir þau. Síðan verð ég að sjá hvort ég sé aflögufær um önnur mánaðarlaun  til að borga öll mótsgjöldin, ferðakostnaðinn og búningana.

Ef einhver er til sem nennir að lesa þetta hefur skýringar á þessu þá má sá hinn sami endilega kommenta og upplýsa mig.


Upp á líf og dauða

Var að horfa á fréttirnar og Kastljósið á RÚV. Þar voru viðtöl við Jón Baldursson, yfirlækni á slysa- og bráðadeild LSH, Bjarna Eyvindsson deildarlækni á slysa- og bráðadeild LSH og Má Kristjánsson sviðsstjóra sama sviðs. Voru þessi viðtöl vegna ákvörðunar yfirstjórnar LSH að taka lækninn sem var á neyðarbílnum og nýta hann til starfa inni á deild. Voru þetta athygliverðar umræður og misjöfn sjónarhorn sem komu þarna fram. Mig langar að blanda mér aðeins í þessa umræðu.Þeir eru sammála um að af þeim 3-4000 útköllum sem neyðarbíllinn fer í árlega, þá séu um 5-10 % útkalla þar sem afskipti læknis geti skipt sköpum. Við erum þá að tala um 150 til 400 manns á ári. Már vill meina að bráðatæknar muni koma í staðinn fyrir læknana og læknarnir koma á vettvang örlítið síðar þar sem LSH verði með tiltækan bíl sem geti farið með lækninn á vettvang þegar þarf. OK, gefum okkur að þetta sé í lagi, að þetta hafi engin áhrif á fjölda dauðsfalla á vettvangi eins og Már og hans yfirstjórn vill gera. Er þá nokkur þörf á lækni á vettvang yfir höfuð, getum við ekki bara látið okkar frábæru sjúkraflutningamenn SHS skila sjúklngunum á slysadeild þar sem læknarnir taka við þeim og sinna eftir því sem kostur er. Skítt með þessa 2-3 sem munu koma til með að deyja á vettvangi og/eða á leið á slysadeild.Skítt með þá, því við getum notað lækninn sem var á neyðarbílnum inni á slysadeild að taka á móti þessum 60-70000 sem koma þar inn árlega. Þetta er kostur vegna þess að eftir því sem Jón yfirlæknir segir þá vantar 10-16 lækna inn á slysadeild til að anna þessum árlegu komum. Nei, það vantar ekki 10-16 lækna segir Már, þetta er misskilningur, það vantar EINN lækni og hann kemur núna af neyðarbílnum og öll vandamál slysadeildar eru úr sögunni. Eða hvað? Nei kannski ekki alveg því yfirstjórnin ætlar að kaupa bíl. Þennan bíl þarf að sérútbúa til forgangsaksturs og svo þarf að ráða a.m.k. 4 menn til að vera á vakt til að keyra þennan bíl. Allavega sé ég ekki læknana keyra sjálfa í útköll á forgangi kannski í lok 24 tíma vaktar. Hvar er öryggi þeirra og annarra vegfarenda þá?En gefum okkur samt að allt þetta gangi upp hjá LSH, náðist þá upphaflegt markmið? Markmiðið er að spara 31 milljón á ári, læknirinn fer á gólfið  og nýtist þar og þjónustan við lýðinn er aukin! Ég sé ekki aukna þjónustu í þessu þar sem gæði utanspítalaþjónustu hljóta að minnka, með fullri virðingu fyrir okkar frábæru bráðatæknum sem ég hef endalaust álit á, þá eru þeir ekki læknar og peningarnir, sem eiga að sparast, fara í að greiða fyrir útkallsbíl lækna og laun ökumanna bílsins. Sparnaðurinn er þá u.þ.b. 5 milljónir á ári. Það er hægt að gera betur við yfirstjórnina fyrir þann árangur ekki satt?Svo má ekki gleyma því heldur að þeir frábæru fagmenn sem manna sjúkrbílana okkar eru einnig slökkviliðsmenn. Hvað ætla menn að gera ef upp kemur á sama tíma stórt umferðarslys þar sem 4 sjúkrabílar (8 menn) eru bundnir í einhvern tíma OG stór bruni þar sem 2 af 5 vakthafandi á Tunguhálsi, Skógarhlíð, og Hafnarfirði eru á slysavettvangi annrs staðar. Hafa menn eitthvað hugsað um þetta?

Ég tek undir með Má Kristjánssyni, það þarf að horfa á heildarmyndina en stjórnendurnir virðast því miður ekki vera að gera það.

Ég skora á heilbrigðisráðherra að kippa þessu í liðinn hið fyrsta og segja við yfirstjórn LSH "svona gera menn ekki". 

Til hamingju Reykvíkingar

Það verður að viðurkennast að nýjasti þátturinn í farsanum sem sýndur er þetta tímabilið í borgarpólitíkinni er sorglegur. Nafni minn, oddviti sjálfstæðismanna, blindaður af gullgeislum borgarstjórastólsins, hefur lagt sig allan fram að ná honum aftur og lái honum hver sem vill. Menn eru jú væntanlega í pólitík til að hafa áhrif og hvar hefur fólk meiri áhrif en í stjórnunarstöðum. Hitt er aftur annað mál hversu langt menn eiga að teygja sig til að komast til valda. Eiga menn að gefa öll baráttumál eftir og jafnvel áhrifamestu stöðurnar, þó það sé bara til skemmri tíma. Ef litið er á stjórnarsáttmála nýs meirihluta þá sér maður öll helstu baráttumál Frjálslyndra og óháðra eða hvað?

Eftir því sem ég rýni betur í þetta þá sé ég ekki betur en að við flestöll atriði stendur "leitast skal við" eða "við fyrsta tækifæri". Þessir tveir frasar segja mér að ekkert á að gera nema lækka fasteignaskattinn og þiggja laun fyrir að vera mikilvæg/ur. Við sjáum nefninlega að skipt er um fólk í ÖLLUM launuðum stöðum, sem þýðir tvöföld laun í 3 mánuði í flestum tilfellum.

Við þessa meirihlutabreytingu gerist það líka að skipt verður um meirihluta og formennsku í öllum nefndum og ráðum og sú vinna sem farið hefur fram þar byrjar eina ferðina enn á núlli því þeir sem taka við formennsku í téðum nefndum og ráðum þurfa nefninlega að finna upp hjólið einu sinni enn svo að þau geti barið sér á brjóst og sagt ÉG gerði mest og best.

Þegar upp er staðið þá er það eina sem Ólafi og sjálfstæðisflokknum hefur tekist með þessu útspili er að lama starfsemi borgarinnar til skemmri tíma og kosta borgarbúa tugi eða hundruð milljóna í valdafíkn sinni.

Við getum kannski sagt okkur það sjálf ef við setjum okkar vinnustað í þessi spor: Skiptið út allri yfirstjórn og deildarstjórum á þriggja mánaða fresti og sjáum hvernig vinnustaðurinn virkar!!!!

Til hamingju Reykvíkingar


« Fyrri síða

Höfundur

Vilhjálmur Óli Valsson
Vilhjálmur Óli Valsson

Tuðari af Guðs náð

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (28.3.): 0
  • Sl. sólarhring:
  • Sl. viku: 1
  • Frá upphafi: 0

Annað

  • Innlit í dag: 0
  • Innlit sl. viku: 1
  • Gestir í dag: 0
  • IP-tölur í dag: 0

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband