Þarna er ekki sparað!

Í svona rugl má henda milljónum og allir fagna. Hvað er að?

Þvílík vitleysa.

Endurgerð fyrsta forsetabílsins lokið

Á þá að loka í sumar?

Ég spyr. Eða á bara að fækka í útibúunum þegar fólk fer í sumarfrí. Þetta eru sorglegar niðurstöður þar sem forstjórar, stjórnarmenn og bankastjórar sitja á sínum ofurlaunum og fárast yfir niðurstöðum ársfjórðungsuppgjöranna þar sem hagnaðurinn er ekki nema 15 milljarðar.

Ætli maður þurfi að fara í viðskiptafræði til að læra þessa vitleysu?

Ráða ekki sumarfólk

Hverjir krefjast hvers?

1. maí. Það koma upp í hugann minningar af litlausum ræðum verkalýðsforkólfa, allavega síðan Guðmundur Jaki var og hét, og grátklökknum pólitíkusum sem boða fagnaðarerindið að ef skríllinn sem kallast verkalýður, fer fram á einhverjar kjarabætur og að ég tali ekki um að það verði eitthvað látið eftir þeim, þá fari ríkið, sveitarfélögin, fyrirtæki og samfélagið í heild sinni á höfuðið.

Þetta er saga 1. maí í heild sinni.

Það breytist ekki neitt þetta árið. Í grein í Fréttablaðinu í morgun skrifar utanríkisráðherra, Ingibjörg Sólrún Gísladóttir, einmitt um að nú þurfi nýja þjóðarsátt, með þáttöku allra undir forystu alþýðunnar. Einmitt, undir forystu alþýðunnar. Það er nefninlega lýðurinn sem á að taka af skarið og hossa undir rassinn á gagns- og ábyrgðarlausum pólitíkusum sem setja í "forgang að ná jafnvægi í efnahagsmálum".

Á þessum sama tíma gera stjórnvöld og fjármagnseigendur ekkert. Stjórnvöld halda í hendina á og passa fjármagnseigandann með þessari fáránlegu verðtryggingu sem þekkist hvergi í hinum siðmenntaða heimi og er ekkert nema trygging fyrir lánveitendur. Davíð kóngur í virkinu við höfnina hækkar stýrivexti á tveggja vikna fresti af því að almenningur kann ekki að fara með peninga og á hann ekki annarra kosta völ en að gera þetta til að kenna fólki að hætta að eyða peningunum sínum. Í öllum öðrum löndum á vesturhveli jarðar er verðtrygging ekki valkostur og stýrivextir eru  LÆKKAÐIR til að sporna við þenslunni og vandræðum á fjármálamörkuðum.

Nei, ég er svo einfaldur að ég skil ekki svona, ég verð líklega að fara í háskóla og ganga svo í einhvern stjórnmálaflokk og frelsast til að skilja þessa vitleysu. Því það er alveg sama hvað IBS og hinir pólitíkusarnir reyna að firra sig ábyrgð, það bara gengur ekki að svara svona endalaust. Hvers vegna hefur ekki komið til afnáms eftirlaunalaganna, hvers vegna erum við að eyða milljörðum í utanríkisþjónustu sem á ekki rétt á sér nema kannski í helmingi tilfella.

Þessir hlutir eru í lagi, berjum bara lýðinn niður, það reddar öllu.

Fjármálastofnanir skila tugmilljarða hagnaði á ári en það er tap á innlendri starfsemi, þetta er allt hagnaður að utan. RIGHT.

Verkalýðsforkólfarnir semja um launalækkanir sbr. samninga VR í síðasta mánuði.

Við erum að skila okkar, það er komið að stjórnvöldum og fjármagnseigendum.

Til hamingju með daginn

Kröfuganga frá Hlemmi

Hollvina hvað?

Hvað er að frétta?

Hefur fólk virkilega ekki annað við tíma sinn að gera? Og hvað svo, eiga yfirvöld að fara að ausa einhverjum pening í þessa vitleysu eða ætla þessi samtök að starfa á þeim grundvelli að það sé hægt að plata einhvern úr þotuliðinu til að faðma verkefnið.

Nei vonandi sér fólk að sér og fer að skipta sér af hlutum og ástandi sem er einhvers virði!

Hollvinasamtök Hallargarðsins stofnuð

Hvers vegna?

Hvers vegna er þetta að gerast? Jú líklega er einföld skýrirng á því, nefninlega efnahagsstefna ríkisstjórnar og seðlabankans er eina raunhæfa skýringin á þessu.

Það er nefninlega þannig að á meðan við búum við verðtryggingu sem gerir ekkert annað en að núlla áhættu útlánastofnana og svo vaxtastefnu seðlabankans (Davíðs), þá getum við, hinn almenni skuldari, ekki annað en farið hægt og rólega í þrot. Hvernig stendur á að við lifum við 8-12% verðbólgu í dag og lausnin er að hækka vexti svo að við erum að greiða af íbúðalánum ca 15-18% vexti???

Svo eru menn að kvarta yfir yfirdráttarlánum. Ég veit það bara að mín lán hækka umtalsvert um hver mánaðarmót og eignahluti minn í íbúðinni er að færast smám saman yfir til banka allra landsmanna og ef spá Davíðs um 30% lækkun íbúðaverðs gengur eftir þá fer bannkinn væntanlega fram á að ég greiði lánið hraðar niður eða fer fram á nauðungarsölu.

Burt með verðtryggingu og borgum eðlilega 8-9% vexti af íbúðalánum. Þetta er sjálfsögð krafa til stjórnmálamanna og fjármálafyrirtækja, en við rekum okkur á það á hverjum degi að stjórnmálamennirnir eru í starfi fyrir fjármálageirann en ekki hinn almenna borgara.

Fleiri nauðungarsölur

Allir út að hjóla

Ég hef verið að spegúlera í að kaupa mér hjól og nota það til ferða í vinnu, svona á þeim dögum sem viðrar til þess. Það er til margs að hugsa áður en maður fjárfestir í slíkum grip, eru diska- eða V-bremsur, hversu margir gírar og af hvaða tegund o.s.fr. Það þýðir víst lítið að horfa bara á verðmiðann, mér skilst að það sé þannig í þessum bransa að maður fær ekki gæði fyrir 10 þúsund, það verður að borga nokkra tugi jafnvel hundrað þús fyrir almennilegt hjól. Jafnvel þó mig vanti bara hjól sem drífur í gegnum Fossvogsdalinn og út á flugvöll.

En á flakki mínu um vefsíður hjólaverslana þá fann ég þetta hjól og er þetta bara ekki málið?

Einmitt

Það er nefninlega það. Ísland og SA borga hæstu laun í heimi. Í hvaða heimi lifir Hannes og hans kollegar hjá SA?? Ég spyr því við erum að sjá ASÍ samninga sem eru brostnir nú þegar þar sem megnið af launþegum eru með tekjur sem eru undir 200 þúsund krónum á mánuði. Ég held að þessir ágætu vinnuveitendur okkar hjá SA ættu að skammast sín fyrir að láta svona hluti frá sér.

Það eina sem getur bjargað vinnumarkaðinum er að flytja inn 500-1000 erlenda starfsmenn. Auðvitað, afhverju var maður ekki löngu búinn að sjá þetta. Jú þetta er rétt það mun bjarga íslensku þjóðfélagi að flytja inn fólk frá austur Evrópu til að vinna almennu störfin vegna þess að þetta fólk er ekki með svona óheyrilegar kröfur eins og íslenski almúginn.

En hvað heldur Hannes eiginlega að Ísland sé á alþjóðlegan mælikvarða? Ég get ekki séð að við getum laðað að hæfustu sérfræðinga heimsins til að starfa hérna öðruvísi en að borga þeim ofurlaun. Ekki koma þeir vegna orðsporsins sem Ísland hefur, hvar eru hátæknifyrirtækin sem gætu laðað þessa starfsmenn til sín. Jú eru þau ekki farin erlendis eða á leið þangað. Nema kannski Decode, það er bara á leiðinni í gjaldþrot.

Vonandi er ég svona illa upplýstur en ég held ekki

Baráttan um hæft starfsfólk á eftir að harðna

Ehemmm

Það er spurning hvort ég myndi hengja þetta upp á vegg hjá mér ef einhver myndi borga mér 35 milljónir dollara fyrir.

Ég er ekki viss.

Sá sjálfa sig á rándýru málverki

USCGC Spencer

Jæja, þá er komið að því að ræða aðeins um veru mína um borð í bandaríska strandgæsluskipinu Spencer, en eins og komið hefur fram áður þá fengum við Rögnvaldur að eyða 2 dögum þar um borð og fengum þar flotta kynningu á öðruvísi kúltúr og aðbúnaði en við eigum að venjast.

Spencer

Eins og glöggir sjá þá er þetta skip talsvert öðruvísi en okkar ágætu varðskip, þó þetta sé í sama stærðarflokki, þ.e. um 70 metra langt og 10 metra breitt. Það sem ég er hrifnastur af við þetta skip er að þyrluskýlið er einskonar harmonikka en það dregst aftur á þyrlupallinn og yfir viðkomandi þyrlu en ekki eins og er um borð í okkar skipum sem og skipum Dana að þyrluskýlið blokkar helminginn af öllu dekkplássi og svo er þyrlan dregin inn í skýlið. Þar með er það upptalið sem þetta skip hefur fram yfir okkar, nema ég telji það kost að vera með 6 sinnum fleiri í áhöfn. Það er nefninlega þannig að á okkar skipum eru 18 kallar/kellingar (takið eftir að hér er gætt fyllsta jafnræðis) en á þessu skipi eru aðeins......og haldið ykkur nú...104 kvikindi af öllum stærðum og gerðum. Þetta verður til þess að ekki verður tækniþróunin jafn hröð og við má búast hjá þessari stóru þjóð, því eins og næstráðandi skipsins komst svo skemmtilega að orði þegar hann var að sýna mér skipið:"we don´t need any technology, we have the manpower". Og þetta er raunin, t.d. þegar verið var að undirbúa dráttaræfingu með Vædderen, þá voru bara sendir 15 kallar að draga til dráttartrossuna með handafli en trossan var geymd einu þilfari neðar og talsvert framar í skipinu. Dráttartrossan dregin upp á dekk.

Það má svo geta þess að þessi trossa sem notuð er um borð í bandaríska skipinu er svo þung að hún sekkur. Þegar búið er að draga þetta fram og til baka þá endar hún svona á þilfarinu.Þetta er snyrtilega gengið frá.

En við skulum víkja aðeins að lífinu um borð frekar en einhverjum leiðindum úr starfsháttabókinni. Það gefur auga leið að frekar þröngt er um liðlega 100 kalla í skipi af þessari stærð. Allavega er ég hættur að kvarta yfir vistarverunum hjá okkur. Það eru 4 æðstu stjórnendurnir sem eru með sér klefa, hinir yfirmennirnir og svo millistjórnendurnir eru í tveggja manna klefum sem eru þannig uppsettir að 2 klefar deila salernisaðstöðu. En þá kemur að þeim óbreyttu. Þeir hafa samtals 4 klefa og í hverjum þeirra eru 21 sem gista saman!!!!!! Það eru semsagt 7 kojustæði upp á 3 hæðir og ekkert annað er í klefanum en salernisaðstaðan er frammi. Ég er ekki með mynd af þessu þar sem alltaf er einhver sofandi í þessum klefum og ekki hægt að vera að hleypa einhverjum túristum þarna inn með flassið blikkandi á myndavélinni. Það er helst að Röggi geti sagt eitthvað um þetta þar sem hann gisti í svona klefa á meðan dvöl okkar stóð. Ég hins vegar var í góðu yfirlæti uppi á SNOB HILL þ.e.a.s. á yfirmannaganginum og þar sem einn yfirmaðurinn var í landi á námskeiði þá var ég með klefa út af fyrir mig. Það er misskipt á milli stétta í Ameríku, maður sá það vel þarna um borð. Þar sem ég ber yfirmannastrípur á öxlunum og hef titilinn Leutenant þá mátti ég ekki mæta lægra settum einstakling öðruvísi en viðkomandi stæði teinréttur og gæfi honour á meðan ég gekk hjá. Þeir hafa sjálfsagt verið fegnir þegar ég yfirgaf skipið þar sem ég var stanslaust á ferðinni allann tímann þarna. Einnig var þetta auðséð á mataraðstöðu yfir- og undirmanna, á meðan undirmennirnir fóru í mötuneytið þar sem var ausið á plastbakka handa þeim (alveg eins og í bíómyndunum), þá var í yfirmanna matsalnum leirtau á borðum og 3 þjónar sem báru í mann matinn (það eru 11 yfirmenn um borð).

En það var einnig frábært að fá að fara með þeim í fiskveiðieftirlit á miðunum norður af þorskhöfða (Cape Cod). Það var skrýtið að biðjast undan því að fara með skothelt vesti en það er standard hjá þeim auk þess sem þeir fara fullvopnaðir í þannig eftirlit. Annars fannst mér erfitt að vera um borð í fiskibátnum og sjá sjómennina henda öllum fiskinum fyrir borð aftur. Af um 1500 kg. holi hefur verið hirt um 70 kg. af skrápflúru og restinni mokaða í sjóinn aftur. Lögin í USA eru nefninlega þannig að það er BANNAÐ að koma með smærri fisk en xx stærð í land og skylt að kasta þeim fiski í hafið aftur. Þegar ég spurði hvort þeir vissu eitthvað um hvað mikið af þessum fiski lifði þetta af þá stóð ekki á svari: "Það skiptir ekki máli, dauði fiskurinn verður bara hluti af fæðukeðjunni aftur". Það er ekki hægt að rífast við þessi rök.

Í sjóinn með þetta.

En það verður að segjast eins og er að ég kem miklu ríkari af reynslu og þekkingu til baka úr þessari ferð og hefði ekki fyrir nokkurn mun viljað missa af þessu.

Læt þetta duga í bili vona að einhver hafi náð að halda sér vakandi niður alla síðuna.

Ferðasaga 1. hluti

Dagana 17. febrúar til 27. mars 2008 var ég um borð í danska varðskipinu Vædderen, en þetta var hluti af auknu samstarfi LHG og Söværnet. Haldið var í fyrstu til æfinga á Faxaflóa þar sem allur búnaður skipsins var keyrður og prófaður. Að kvöldi 19. febrúar var haldið til veiðieftirlits á rækjumiðunum við austurströnd Grænlands og verið þar fyrsta hluta ferðarinnar. Á þeim miðum  var farið til eftirlits í öll skip sem sáust án tillits til hvenær þau voru skoðuð síðast. Var okkur boðið með í veiðieftirlit og eru verkferlar og það sem skoðað er mjög sambærilegt við það sem gerist á okkar slóðum. Einnig var mér boðið í frábært útsýnisflug yfir smáhluta austurstrandarinnar.

Þá var siglt suður fyrir Grænland og haldið til Narssarsuaq þar sem skipt var um hluta áhafnar og í kjölfarið var farið í verkefni sem eru fyrst og fremst til stuðnings byggðum landsins, allt frá því að brjóta ís og búa til siglingaleiðir og upp í að flytja vörur og fólk á milli staða. Milli þessara fólksflutninga var miklum tíma eytt í æfingar og er lögð mikil áhersla á að viðhalda hæfni manna í þeim verkefnum sem skipið er gert út fyrir. Vegna viðhalds þurfti að stoppa  í Nuuk í 5 daga. Í Nuuk nýtti ég tímann til gönguferða um plássið, svona eins og hitastigið leyfði því það er staðreynd að eftir rúmlega tveggja tíma útiveru er maður orðinn frekar kaldur. Hitamælirinn á símanum mínum sagði, eftir 2,5 tíma að hitastigið væri 4 gráður og ég ver með símann í vasanum!!!!

Eftir Nuuk var haldið til Narssarsuaq þar sem komu svo um borð 15 nemar úr skóla óbreyttra hermanna ásamt leiðbeinanda sínum en er þetta val hjá þeim þar sem allir þurfa að skila samfélagsþjónustu í Danmörku ef þeir fara ekki í framhaldsnám. (Ég held örugglega að þetta sé rétt hjá mér).

Þaðan var haldið út á grænlensk sund þar sem haldnar voru almennar bruna- björgunar- og dráttaræfingar með gæslubátnum Tulugaq og í kjölfarið voru skotæfingar af stærri vopnum skipsins, þ.e. fallbyssu og 50 calibera vélbyssu.Að þeim æfingum loknum var lagt af stað til Boston þar sem skipið var í leitar- og björgunaræfingum með bandarísku strandgæslunni en það kemur sér pistill um þá ferð og sér myndaalbúm. 

Hvort sem þið trúið eða ekki þá talaði ég eingöngu dönsku alla ferðina og eru framfarirnar í tungumálinu stjarnfræðilegar. Ótrúlegt er langlundargeð Dananna að endurtaka sig þegar ég hváði og að þeir skuli hafa reynt að skilja það sem ég var að reyna að koma frá mér.

Þetta er ekki mikið sem ég er að segja en ég verð að passa mig vegna þess að þetta er jú herskip og það eru allar þeirra ferðir og verkefni trúnaðarmál svo þetta verður að vera svona meira almennt hjá mér.

Ég setti samt nokkrar myndir inn í albúm sem heitir Vædderen og set svo meira frá USA þegar fram líða stundir. Ég er að reyna að eyða tíma mínum í námsbækur þessa dagana, þ.e. þegar ég er ekki að vinna, en próf eru hjá mér fyrstu vikuna í maí.